ابدأ بنفسك

haveavote1-full

علشان بنحب مصر .. وعلشان ملناش وطن تانى …. وعلشان أنا من جيل ما شفناش أى انتصار الا انتصارات الكورة الهزيلة  والباقى هزايم هزايم … علشان أنا من جيل أصبح تزوير الانتخابات شئ مُسلم بيه  وبديهى زى طلوع الشمس… علشان أنا من جيل الكل قال عنه انه جه بعد ما كل الخير انتهى … يبقى لازم نتغير ونغير واقعنا لإننا ببساطة مش ها نبقى آخر جيل.

عندك بطاقة انتخابية ؟؟؟

مستغرب ليه ؟ أيوه لازم يكون عندك بطاقة انتخاب حتى لو كنت من المؤمنين بإننا أصبحنا عبيد للسلطة وإننا ها يفضل محلنا من الاعراب مفعول به وعمرنا ما هانبقى فاعل.

الدعوة عامة لكل مصرى .. لكل مصرى .. لكل مصرى  بأنه يستخرج بطاقة انتخابية وينشر الدعوة لأهله وأصدقائه لاستخراج البطاقة الانتخابية.

لازم منظر الهيئات الحكومية وأعضاء الحزب الوطنى وهما مأجرين ميكروباصات وبيركِّبوا الناس اجبارى ويشحنوهم من المصالح الحكومية المختلفة لصناديق الانتخاب لترشيح الحزب ورجالته .

كفاية سلبية وخلينا مره واحدة ايجابيين ولو حتى ما قدرناش نغير الواقع , فعلى الأقل ها يكون لينا مبرر نقوله لأولادنا اننا حاولنا نغير ومقدرناش .

لسه قدامنا فرصة وللأسف مش ها تستنى كتير . 2010 سنة فاصلة فى تاريخ المصريين .

مش لازم تكون مهتم بالسياسة علشان يكون ليك صوت انتخابى .. لكن لازم تكون مصرى وبتحب البلد دى .

يا ترى ها يبقى عندك بطاقة انتخابية ؟؟؟

No comments: